أنا حَبيتكْ يخربْ بيَتك ..

ع الهامش ..

-1-

صبايا منشان الله اطلعو من فيلم انو تشجعو ايطاليا . " انا صبية كمان وبعرف انهم حلوين " بس برضو اشي ومنو .. فتحتو براسي شباك !

-2-

من كم يوم بحكي مع صديق ورفيق لالي مغترب بالمانيا .. هوي رفيق كثير كثير يعني .. بنام يحلم بالثورة وبصحى يحلم بالثورة ، بطلع بالباص يسب عالنظام الرأسمالي . بفوت عالمحاضرة يكفر رب دين الاستعمار .. يعني بالمشرمحي ساطحني بالمبادئ . اللي صار انو بسألني " شو عم تعملي ؟ " جاوبتو ببراءة : " عم اوكل بطيخ بلا بزر " .. مضلش رب . دين . نبي . سماوات . اراضي الا قلبها ع راسي .. ع اساس انو البطيخ بلا بزر اشي كثير برجوازي ومش لالي .. ليش انا اوكلو .. وين المتعة اصلا باكل البطيخ اذا كان بدون بزر .. كيف بدي اتفتف ( من تفة ) ؟ ليش اسمح لهيك شغلة تصير معي !

طيب أحكي شغلة وأمري لله .. آخر مرة اكلت بطيخ ببزر يمكن كنت بصف تاسع او ثامن ..لما كان يجيي زلمة من البطوف مع سيارة بطيخ اصلي وبلش ينادي يا بطيخ يا بطيخ .. إلخ ! كان ابوي يشتري منه كمية ومرات كان يشتري كل السيارة ويقسمها على كل الحارة .. هيك صار .. انا فعلاً اليوم بشوفش بطيخ مع بزر واللي بوصلني عالبيت بدون بزر .. شو اسوي طيب ؟!

-3-

للأمانة يعني " حارس مرمى الجزائر " اشي جداً جميل .. يعني كمان للصبايا فيكو تشوفو فيه فتى احلام وفارس جاي ع حصان ابيض

-4-

مرة جربتو تتمعنو بكلمة " معمية اقماري " ؟

-5-

لنكون صحاب :)

الصيف فصل قميء

وانا بوصل لمرحلة إني :

مَوعدنا بُكرا ..

بعد غياب " كثير كثير طويل " .. قررت أرجع ! يمكن لأسباب كثيرة .. رجعت لفيت عالمدونات بشكل سريع " زعتر ، متشرد ، مستقل فكريا ، عيون خشنة " وكثير غيرهم .. حسيت إني مقصرة بحقهم وبحقي بإني احكي .. أصرخ .. أغني .. ابكي .. وأضوج وأضّوج الدنيا كلها فييّ !!

الحلم ببكرا أحلى صار مُزعج .. ويمكن صار لازم نطلع من فيلم الأغاني والأمنيات والأحلام .. " مش متخيلة حالي إني بعرف مين اللي بحكي اصلاً ، عالأكيد مش انا .. مش ( ناس من ورق ) !

الناس بالعالم الحقيقي وبالافتراضي صايرين ؟ " لأ من زمان هنّي من ورق .. ويمكن الورق بدو شُعلة نار ليحترق وعلّوا لو يحرق كثير شغلات معه !

شو بدك تحكي مهما تحكي مافي مين يسمعك
بتحس انك بوطنك منفي والهوا عم يخنقك

من جديد i!i

لا زلت أقاوم
وأبحث عن الحُرية .
وأحبك َ !

مش قصة هاي !

ستي بتقول : صرتي بنت كبيرة / هيك عيب / لازم تخطبي !

إمي بتقول : أول عريس رح يجيي بدك توافقي / السترة للبنت فش أحسن منها !

أختي بتقول : من تجربة تدخليش هيك دخلات / بعدك صغيرة / عيشي حياتك / هفففف الجيزة هّم !

صاحبتي بتقول : لازم نشحط الشب لعنّا / بعدين نكبّو بأول حاوية زبالة / الشباب هيك بدهم !

حضرتي بتقول :
مش همّي يكون طابق منّو آمن
مشتاقة شوفك ..لكن !

لقيتها حاطه صورة الرب !

حاسستها صايرة اشي كثير " موجزام " - لشو المبالغة يعني / شهرين زمان وبتقلبلي حالها هي رب !
فهمنا إنك حدا فهمان / قارىء ( والرب لحالو عارف شو قارئه - ما بشوف غير هالستاتوس الفيس بوكي ضارب عَ شعر درويش / الحرمة من كم يوم اكتشفت وجود أدونيس والسياّب ) !
ما علينا من كل هالحكي !
فتحت الفيس بوك لاشيك شوية عليه ..بلاقيها حاطه صورة لله ! انا غمضت عيوني واستغفرت شي 3 مليون مرة !
طيب مش عيب يا " رفيقة " تحطي صورة لله ؟ والله والله بكسر الهاء انسم بدني !

نترككم مع الهبل اللي مش غادرة أستوعبو وعالاغلب مش رح أستوعبو !
مع صورة الرب والرفيقة المتأملة بملكوت الرب